Khamis, 3 Julai 2014

Nama kebuah parti PBB enda disengkaum sida

KUCHING: Kaban Kunsil Besai Parti PBB Datuk Abdul Karim Rahman Hamzah (gambar) madah, iya alit ati ke penemu PRS, SUPP enggau SPDP ke berebutka kerusi maya diatu.
Pengawa bepilih besai nengeri (PRN) agi jauh ari diatu, iya madahka diri alit ati meda tiga komponen BN nya majak madahka penemu sida ke enda lantang ati nengah media.
“Nama kebuah (PRS, SUPP enggau SPDP) rindu ngaga penyarut pasal kerusi jam diatu? Pengawa Bepilih Besai Nengeri agi jauh endar sereta Kunsil Nengeri (DUN) kitai bedau diketu.
“Nama kebuah bekelikuh pasal kerusi maya diatu, lalu nama kebuah parti PBB enda dibai, lapa enda nanya penemu ari kami dulu nyangka tau bejuraika kerusi nya,” tanya Karim.
Iya nanya munyi nya lebuh nimbal jaku presiden PRS Tan Sri Datuk Amar Dr James Jemut Masing ti madahka ‘merger of minds’ entara SUPP, SPDP enggau PRS agi relevan taja pan Kaban Kunsil Nengeri (ADUN) Pelagus, George Lagong enda disengkaum dalam Teras.
Abdul Karim ti mega Menteri Muda Pengawa Berumah madah: ”Enti gempung runding nya kena negapka BN, nama kebuah PBB nadai disebut? Enda ke tegap agi enti PBB disengkaum sekali (dalam gempung runding tauka ‘merger of minds’)?”
Taja pan udah diterangka sekeda orang ba penemu ‘merger of minds’, Kaban Kunsil Nengrei Asajaya nya tetap enda lantang ati lalu madahka iya semina beratika saut sayap nembiak SPDP enggau PRS ke madahka kebuah PBB enda dikangau ‘ngempung runding’ nya laban ku sida iya kerusi parti (PBB) nya enda dikachau.
Menteri Muda Pemansang Nembiak nya madahka enti sema PBB nyadi tulang belakang BN menua, tentu tiga buah komponen parti nya bisi adat ngangauka PBB bejuraika pekara nya ke dipadah tau ngachau BN menua tauka enti bisi pekara bukai ke enda ngelantangka ati entara komponen parti.
“Manah agi ari ngaga pengawa begempung sida tiga kediri empu lalu madah ngagai dunya iya nya tiga buah parti nya bisi 36 kerusi alai bediri ila lalu seiti agi kerusi lebih ari penyampau ke diempu PBB.”
Abdul Karim madah, pekara ti dikemeratka PRS iya nya gempung runding ari tiga parti (merger of minds) laban Lagong madahka diri masuk Teras maya sida ngatur aum media pasal Teras empai lama ke udah.
“Diatu Teras nengah Datuk Peter Nansian Ngusie madahka George Lagong enda disengkaum agi dalam parti nya, diperatika ‘status quo’ enggau kebuah ‘gempung runding’ nya enda berubah. Nama kebuah?”
Masing ti mega ADUN Baleh, nandu penemu, ‘gempung runding’ nya kena negapka BN ngelaban penyakal.

            

0 ulasan:

Catat Ulasan